Salibaghon
by: Blessed Jel C. Morano

"Gusto kang malipay?" hagawhaw sa dalagita
Ngadto sa lalaking yagpison apan may postura.
Limbarok! Dugay pa gong manukli ang tindera
Sa ukay-ukay nga giladlad sa may eskina,
Gutling lang ang panagsabong sa ilang mga mata
Nagsinipitayng nanulod sa ngi-ob nawala,
Ingon nga gilamoy sa higanteng bakunawa,
Aron didto dimdimon ang daklit nga himaya!

Mini nga mga anyos namilit, namungingi
Atolihong dalunggan sa tinun-ang lalaki,
Buhok pinatuybo, talinis samas alambre
Bisan tuyom di makig-indig ni makigtigi,
Kalaklak sa karsones, sayal na sa babaye
Notbok sa bulsa gisuksuk wa hatagig bili.
Pamalandong mikiat sa akong pagpauli
Nganong ingon niini ang giluyong nga mithi!

Mga drayber sa bus ug dyip-de-pasaher
Murag gihamok sa mga bat ug engkanto,
Obertik wag-tuo, tulin pas alas kuatro
Itom pa kaayou ang gisuka sa tambutso!
Sila mga saling sa kasakit kaniadto
Sa bantugang dila nga si Natalio Bacalso,
Lungon sa kadalanan ilabay kos impyerno!

Daw uhong sa ting-uwan, nanurok, nanguyapot
Tanang matang, suok sa katilingban mikutkot,
Mga swapang sa salapi pagkaayong manimhot
Sa sungkabunon, naliwat sa ilagang pawot.
Naa pay pulitiko ug opisyal nga kurakot,
Kalipay ilang kinawat mga tawo way labot
Karon nga ekonomiya nagpinal, naut-ot,
Way kauwaw nga adtos mga tawo mangayog amot!